Дола-Коарча культуран Цӏагӏа Даь ди дездир
Дола-Коарча культуран Цӏагӏа «Низ барий, йоакхо ечар цӏай» яха лаьрххӏа йола кхетаче дӏайихьар, из хетаяь яр Россе Даь ди дездеш хилара. Из кхетаче дӏахьош хилара керттера бахьан дар дезалера мах бола ӏадаташ доаржадар, бераш кхедара юкъе дас дакъа дӏалоацаш хилар, иштта дег чура безам хӏара фусаме хьакхоллар, берий таро хургйолаш шоай даьна дег чура баркал ала, из веза.
«Цӏайна хетаяь программа дӏахьош яр тха балха новкъост Бохтаранаькъан Имана. Цо зӏамигача хьаьшашта довзийтар Россе из цӏай хьакхоллара бахьан, цо дийцар даь къахьегам лархӏарах. Цига иштта белгалдир, маӏача сага низ, даим цо еш йола дезала терко, уж хьаллоацаш хилар, моллагӏча дезалашта эшаш долга», - аьлар «Сердало» газетага Дола-Коарча культуран Цӏен кулгалхчо Алерой Билала.
Эггара безамегӏа тӏаийцар къонача ӏомалуш бараша гойташ хинна кхоллама программаш. Цар безамца йийшар шоай даьшта хетаяь байташ. Цига берий таро хилар шоай артистий начӏал гойта, шоашта хетар ала, цар белгалйир бокъонца болча къонахий дика оамалаш, низ, денал.
Цу тайпара вӏашагӏъехкача кхетаченашка гуш хул лоархӏаме вахарца хоттаенна хьехархой оагӏув. Цар новкъостал ду бераш шоай даьй лоархӏаш, дика тӏехье йолаш хьалкхеде.
