Карагӏдаьннарех, иштта дӏахо де дезарех дийцар РДНТ
Къаман кхоллама Цӏен тоабанца, укх шерара эггара хьалхара кхетаче дӏахьош хилар цу моттига кулгал деш вола Зурабанаькъан Ахьмад. Дӏадахача шера кхоачашдаьрех, иштта дӏахо дӏабахьа безача балхах дийцар цига.
«Кулгалхочо цу кхетаче дийцар 2025-ча шера аьттув баьннарех. Белгалдир, дӏадахача шера фольклорни, этнографически проекташ, моттигера фестивалаш, къаман кхолламцара яхьаш, тайп-тайпара балхаш леладеча пхьарий хӏама хьаллоацаш, къаман культура кагирхошта юкъе йоаржаеш кхетаченаш хиннилга», - яхаш хоам бу «Сердалога» РДНТ зарбан болх лелабераша.
Зурабанаькъан Ахьмада болхлошца дийцар РДНТ хьалхашка латтача лоархӏамеча декхарех. Гӏалгӏай къаман культуран, исторен, ӏадатий хӏама хьаллоацаш; доаржадеш; вай наьна метта хӏама эша ца долийташ; болх ба лоаттабе безар. Иштта начӏал дола къонабараш гучабоахаш, фольклора хӏама шердара тӏехьа керда наькъаш лохаш, къахьега деза болхлоша. Зурабанаькъан Ахьмада баркал аьлар ерригача тоабанна, хьалхашка латта декхараш кхоачашдара тӏехьа къахьегаш хиларах.
«Къаман кхоллама оагӏонца дувзаденнараш тоадарал совгӏа, вай культура дийнъеш, къонабараш цу юкъеозаш къахьега дезаш да вай», - белгалдир кулгалхочо. Хьаэттача шерца шоай кхоачашде дезараш белгалдир цига. Ший болх дикка тоабара наькъ тӏа тӏатеӏӏа къахьега лаьрхӏа я еррига тоаба дӏахо а.
