«Къел айп дац» яха спектакль гойтар вай мехкарча театре
Эрсий паччахьалкхен ашарий-драматически театра актёраша бахархошта гойтар Островский Н. комедех оттаяь «Къел айп дац» яха спектакль. Республикан культуран оагӏонцарча вахаре лоархӏаме болх ба из. 1853-ча шера язъяь из пьеса тахан а массабарашта езаеннарех я. Цо дувц вӏаьхий хилараи ший юхь лораеш эздий вахараи юкъерча къовсамах.
«Из спектакль вай хьажархошта езаенна дикка ха я. Актёраша гойтар вӏаьхийча тӏаьргахочун йоӏ Люба, цун везавенна Митей вахаре малагӏа хӏамаш лерхӏаме хеташ ба. Вӏаьхий хилар ахчах дизача кисаца ца дусташ, цӏенача дега йӏовхалца дусташ ва тӏаьргахочун йоӏ езаеннар. Дакъа лоацаш бола актёраш ба Абаьданаькъан ӏалихан, Лимарев Тимур, Тӏоаршхой Лом-ӏаьла, Кхорахой Сабина, Джабагӏанаькъан Яхий, Алешковская Виталина. Дуккхача хӏамай уйла яйташ яр спектакль», - дийцар «Сердалога» театре.
Белгалде деза, вай мехкара эрсий театр дунен драматурги йоаржаеш, толашагӏа йола пьесаш наха гойташ, къахьегаш долга. Хӏаьта «Къел айп дац» яха спектакль вахарера дукха хӏамаш дагадохийташ я.
