Буро кӏалхара Батакъанаькъан урам тоабе болабаьб болхлоша
Наьсарен кхален моттигашкара наькъаш тоадара болх хьинаре дӏахьош ба тахан. Укх наькъа Буро кӏалхарча 400 метрага кхоачаш бӏаьха болча урама хьал меттаоттаде лаьрхӏа арабаьлар болхлой. Берригача мехкара наькъаш тоадеш, дӏахьош боккха болх ба из. Белгалде деза, вай мехкада Келаматанаькъан Махьмуд-Ӏаьла цу гӏулакха лакха терко еш волга.
«Болх дӏахьоча моттиге баха хилар мехкарча Паччахьалкхен Кулгалхочун гӏонча Кокурхой Адам, Наьсарен кхален кулгалхочун декхараш кхоачашдеш вола Овшанаькъан Мухарбик, Буро кӏалхарча администрацена хьалха латта Кӏуренаькъан Мухьмад-Башир. Болх малагӏча боараме дӏахьош ба, малагӏа кхоачамбоацараш да техкар цар.
Укх бетта 17-ча дийнахьа дӏаболабаьб из болх. Хаоттам хувцабенна хӏама ца хуле, тов бетта 10-ча дийнахьа беррига болх чакхбаьнна хила безаш ба», - дийцар «Сердалога» Наьсарен кхален администраце.
Из никъ тоабар бахархошта доккха совгӏат хулаш хӏама да. Жагӏа а асфальт а ӏобуллаш, дикка шаьрбергба никъ. Хӏанзолца цига гӏолла дӏа-хьа аха машинашта, иштта гӏаш болхарашта хало хиннадале а, йоккха юкъ ялале бовзаргбоацаш хоза тоабаь хургба никъ. Кхерамзленца дувзаденнарашка диллача, геттара лоархӏаме болх ба из.
