ГӀаьзе-Коа энергетикаша ЛЭП цӏенхаштта тоайир
«Къилбаседа Кавказа Россеташа»- «Ингушэнергос» кердадаьхар тока саьргаш 0,4 кВ; юртарча Свободы урам тӏарча 20 цӀеношка ток лоаттаю цар, яхаш, хоам бу «Сердало» газетага республикан Паччахьалкхен зарбан болх лелабераша.
«Из болх дӀахьош хийцар 900 метр къаьнара тока саьрг, таханарча заман дикагӀа болчаа саьргаца (СИП). Кердача тока саьрго тешшаме болх бергба кхераме хьал а доацаш», - аьлар хоамо.
Цу тайпара болх дӀабахьар лоархӀаме да ток лелаерашта, хӀана аьлча керда саьргаш дуккха тешамегӀа да. Уж вӀаший хьекхалуш а дац, нагахьа санна чӀоагӀа мух баьнна хуле лотадалар кхерам болаш а дац, цул совгӀа ара шелал эттаяр аьнна, уж ша тӀабижа гӏорадергдац. Уж да дикагӀа дола тока саьргаш, даим ток наха дӏакхоачийташ болх бергбола. Цу ерригача таронаша токацара хьал наха кхераме доацача доаккх.
