Инаркъерча маьждига хьалхашкара доазув тоадир
Инаркъерча маьждига гонахьара доазув тоадеш, дӏахьош хинна балхаш даь даьлар. Дукхача наьха дехарах дӏахьош бар из болх. Юрта администраце низаца цига асфальт ӏобиллар, цу лоархӏамеча моттига гонахьара доазув кердадаьккхар. Хӏанз цига хьаухача наха а паргӏата, цӏена я.
Инаркъерча администраце кулгалхочо Котанаькъан Адама «Сердало» газетага аьлар, администраце кулгалхоша даим теркам лоаттбу, наьха хьашташ кхоачашдара. Цу юкъе къаьстта а теркалду наьха вахара хьалаш лакхача боараме хилийтар.
Цо иштта белгалдир; бахархой лоархӏаме хаттараш тӏехьа а ца тетташ, сиха кхоачашде хьож шоаш, аьнна. Маьждига гонахьара моттиг тоаяр, из кердаяккхар лоархӏаме да. Бахархошта дика вахара хьалаш хьакхоллара, юрта куц-сибат хувцара болх дӏахо а дӏабахьа лерхӏаш ба цига.
