Бахархоша дехар даь, Сурхо тӏарча урама хьал меттадоаладеш бола болх сихбир
17.04.2026 15:48
Сурхо тӏара Налганаькъан цӏерах бола урам тоабеш боахк тахан болхлой. Из хоам «Сердалога» бир цу юртарча администраце.
«Юххьанца лаьрхӏадар эггара хьалхарча аргӏагӏа кхыйола, лоархӏамегӏа йола моттигаш тоае, бакъда бахархоша дехар даь, тӏехьатетта хинна Налганаькъан цӏерах бола урам тоабеш бола болх тахан дӏаболабаьб», - йоах тхогарча хоамо.
Ах километрага кхоачаш болча наькъа 300 метр доазон тӏа асфальт ӏобиллаб болхлоша. Вӏалла асфальт хиннабоацача цу наькъо бахархошта чӏоагӏа хало йора, дӏа-юха ухаш.
Бовзаргбоацаш хоза тоабеш латтача наькъах юртарча наха доккха совгӏат хургда.
