Гӏажарий-Юрта халкъа кхоллама концерт хилар
Гӏажарий-Юрта дика вӏашагӏъелла ашарий программа дӏайихьар, «Цаӏ дола халкъа кхоллама ди» яхача Ерригроссийски болама хетаяь. Моттигерча культуран Цӏагӏа дӏахьош хиннача кхоллама сайрен керттера бахьан дар, мах бола культуран тӏехьале лораяр, кхувш йоагӏача тӏехьенна къаман ӏадаташ довзийтар, иштта халкъа кхоллам боаржабар.
Фольклор - из халкъа дийна дагалоаттам ба, цунга гӏолла гуш хул цун уйлаш, истори, къаман оамал. Цудухьа из цӏай-кхетаче йолаш гойтар вай мехка уж ӏадаташ лорадеш хилар.
«Концертни программа чудоагӏаш дар гӏалгӏай лаьтта бахача наьха цӏена уйлаш, хоза оамалаш гойташ дола иллеш. Культуран Цӏен начӏал долча солисткаша ӏоахарганаькъан Хадизас, Эльгакаева Седас дӏааьлар къаьнара гӏалгӏай иллеш. Цар хозача оазо, дӏаяха вахара ханаш, цар кӏоаргал юхайоалаеш уйлангахьа бигар ладувгӏаш хиннараш. Иштта хоза концерта номер гойтар Тамаханова Марема, цо самукъадаьккхар ший хозача иллешца, безамеча оазаца уж дӏаоалаш», - аьлар «Сердало» газетага Гӏажарий-Юртарча культуран Цӏен кулгалхочо, Гӏалгӏайчен цӏихезача культуран болхлочо Йовлой Ювсапа.
Концерте хиннача наха доккха совгӏат хилар цу программах, наьха самукъадаьлар, царна дайзар хьамсарча мехка ӏадаташ, царна хезар ашарий дийна оаз.
