Россе Паччахьалкхен байракха Ди дездеш хилар Пхьилекъонгий-Юрта
Боккхача мехка вахаш волча хӏара сага лоархӏаме да, РФ Паччахьалкхен байракха Ди. Цу доккхача цӏайна хетаяь кхетаче дӏахьош хилар Пхьилекъонгий-Юртара культуран Цӏа, № 1 йолча цигарча ишколаца, кхален культуран Цӏен болхлошца цхьана.
«Цу кхетачене гулбеннабар Наьсарен кхален администрацера, ФОКера, библиотекера болхлой, иштта юртара нах. «Даьймехка бесаш» яха Даьхенцарча лерхӏамах бола болам дӏахьош хилар цига, кхален администраце болхлошка хьалхале йолаш», - дийцар «Сердалога» из гӏулакх дӏахьош хиннараша.
Лоархӏаме хьаьший болаш кхетаче дакъа лоацаш хилар Наьсарен кхален «Цаӏ йола Росси» яхача парте оагӏонна кулгал ду Эккажанаькъан Идрис, депутатий кхален совета кулгалхочун гӏонча вола Шоанахой Джабраил, «Россе цхьанкхетар» яхача гӏо деча ганза хьалха латта Цӏечой Бекмарза, Наьсарен кхален администраце вахара оагӏонцарча гӏулакхех долча даькъа хьалха латта Саганаькъан Мадина, Наьсарен кхален РДК кулгалхо Дзейтанаькъан Темарлан.
Культуран цӏен, библиотекан болхлоша боккха болх дӏабихьабар, цу цӏайга кийчо еш. «Хьалхарбарий болам» яхача оагӏонца, Россе аьрзелгашца паччахьалкхен триколора зигаш дӏадекъаш болам дӏабихьар цига, тӏаккха сигала байракх урагӏхеца гулбелар. Наьсарен кхален РДК артисташ бар цига массане дог гӏоздаккха хьожаш къахьегаш. Балайнаькъан Мухьмада, Йовлой Евас, Султиганаькъан Хадижас иллеш аьлар гулбеннарашта. Цӏайна хетаяь кхетаче дӏахьош хиннараша доккха баркал аьлар юртарча юкъарча оагӏонцарча балха хьалха латтача Эжинаькъан Ислама, Пхьилекъонгий-Юртарча № 1 йолча ишкола кулгалхошта из болх дӏахьош гӏо дарах.
