Пхьилекъонгий-Юрта 420 моттиг йола керда ишкол хьалъергья
Наьсарен кхален Пхьилекъонгий-Юрта хьалъе йолаяьй вай заман хьалаш дола 420 моттиг йола керда ишкол. Цу йоккхача юрта тахан 17 эзар саг вах, из ишкол хьалъеш хилар доккха совгӏат да бахархошта. Из хьалъеш я исторически моттиге, хьалха цига къаьнара бийдача кирпишках яьча №1 йолча ишкола гӏишло яр. Из хьалъяьяр 70 шу хьалха, цудухьа дукха низ тӏалатта йиш йолаш яц.
Ишколаш, берий бешамаш - из берий кхоаненна ӏаткъаш дар да, цудухьа оаха цу гӏулакха керттера терко лоаттаю. Ала лов, тӏехьарча ялх шера, Гӏалгӏайче 49 ишкол, 51 берий беш хьалъяьй, аьнна. Из де таро хилар къаман проекташ хилар бахьан долаш, уж хьаллоац Россе Президента, иштта федеральни программо, цу юкъе «Юртара доазонаш дегӏадоаладар» яха программа а йолаш»,- аьлар Гӏалгӏайчен кулгалхочо Келаматанаькъан Махьмуд-Ӏаьлас.
Хургйолча ишколо доаккхалца лелаергья цӏихезача вай мехкахочун – Российски Федераце Турпалхочун Осканаькъан Сулумбика цӏи. Керда ишкола хьалъяро таро лу исторически дагалоаттам лелабе а, дешара хьал тоаде а.
Пхьилекъонгий-Юртара бераш таро йолаш хургда паргӏата кабинеташ а, цунга хьажжа дешара хьалаш а долаш деша. Эша гӏирсаш чулатташ кабинеташ, спортивни зал, актови зал, арара майдаш, столови, лорий кабинет хургья цу чу.
