Зӏамагӏа йолча классашка багӏарашта, иштта СВО доакъашхой берашта, мах боацаш, кхача лоаттабергба ишколашка
Хьатӏадоагӏача кердача дешара шера 1-4 классашкара беррига дешархой, мах боацаш, бӏайхача кхачанца ӏалашбаь хургба вай ишколашка. Дӏадахача шера республикера юххьанцарча классашкара бераш 100%-га кхоачаш чулаьцар цу гӏулакхо, 152 паччахьалкхен ишколашкара 33 490 бер, мах боацаш, хӏама даа аьттув болаш хилар. Къаьстта терко лоаттаеш ба СВО доакъашхой берашта. 5-11-ча классашка дешаш дола цар бераш ишколе дуача хӏамах ахча тела дезаш дац. Дӏадахача шера цу беркатеча гӏулакха юъе дар 1365 бер. Цул совгӏа, дегӏа могашал эшаенна долча, цӏагӏа хьехархой дӏаухаш дешаш долча берашта а лоаттаду дӏайха даа хӏама.
«Берашта кхача лоаттабара гӏулакх боаггӏача боараме тоадаь хила деза. 2023-ча шера Эбарга-Юртарча, Шолжа-Шахьарерча берашта даа хӏама кийчдеча моттигашка из хьал мишта латт тахка ваха хилар со. Цу хана, 121 паччахьалкхен ишколех 27-не ший даа хӏама кийчдеш моттигаш яцар, бӏайха кхача кхычахьара хьакхухьаш бар. Из вӏалла хила йиш йолаш хӏама дац! Пищеблокаш тоаеш болх дӏаболабаьб оаха тахан. Хӏаьта керда ишколаш хьалъеча хана, юххьанца проекта юкъелоацаш да из. 2026-2027-ча дешара шера мах боацаш дешархошта бӏайха кхача лоаттабе аьнна хьахьожадаьр 526,5 млн сом ахча да, царна юкъера 497,7 млн сом - федеральни оагӏонцара да», - язду ший Телеграм-оагӏон тӏа вай мехкадас Келаматанаькъан Махьмуд-Ӏаьлас.
Республикан кулгалхочо белгалдир, берашта ишколе дӏайха даа хӏама хилийтар эггара хьалха цар унахцӏенон, физически хьала уйла еш хилар долга. Цунга хьежжа чӏоагӏа терко лоаттае езаш гӏулакх да из. Берашта телаш бола кхача боаггӏача боараме тоабаь хила беза, иштта цӏена, санитарни хьал лертӏа долаш хила еза хӏама дуаш йола, даа хӏама кийчдеш йола моттигаш.
