Къаьнарча Магӏалбике ӏотекха хинна лаьтта дӏадоаккхаш боахк
13.04.2026 20:51
Магӏалбик-Вежарий-Юрт яхача наькъ тӏа, № 6 йолча ишкола йисте, лаьтта ӏотекха моттиг хилар. Кӏалхара никъ дӏакъайлаб цу гӏулакха. Шахьарерча РСЧС болхлоша, наькъий гӏулакхех йолча министерствон къахьегамхоша, сиха оацаргӏбаьнна, болх дӏаболабир цига.
«Къаьнарча Магӏалбика лаьтта ӏотекхача Картофельни оалача моттига доазонга хьожаш хилар шахьара да вола Боканаькъан Мухьмад. Шийца мэре болхлой, иштта цу оагӏонцарча гӏулакхех бола къахьегамхой болаш, из гӏулакх меттадоаладеш фу де йиш я хьежар из», - дийцар «Сердалога» шахьара мэре.
Магӏалбик-Вежарий-Юрт никъ дӏакъайла хургба деррига балхаш чакхдаьнна даллалца. Шахьара администраце тӏахьожам беш да из гӏулакх. Никъ дӏа-хьа ваха йиш йолаш, маца хьабелларгба тӏехьагӏо хоам бергба.
