«Фаьлг» яха Магасера берий беш цӏенхаштта тоаеш, болх дӏаболабаьб
Магасера ӏарапханаькъан М. цӏерах йола «Фаьлг» яха берий беш тоаеш, болх дӏаболабаьб мехка. Из хоам «Сердалога» бир мехкарча Минстрое.
«Болх дӏаболабаьб. ООО «Стройкомфорт» яхача фирма къахьегамхой ба цига боахкараш. 18 тайпара балхаш да цар чакхдаха лерхӏараш. Цу юкъе да канализаце, тока, хин оагӏонаш хувцар, цӏи яьлча хоам беш дола гӏирсаш оттадар, пенаш шаьрдар, кораш, наӏараш хувцар, кӏийлен тӏа, пенаш тӏа ӏоакъа тохар, йӏовхала лаьрхӏа керда гӏирсаш оттадар, арахьарча моттигашта кхера тохаш, куц тоадар», - йоах тхога бенача хоамо.
Цхьа минот ца йоаеш, тӏатеӏӏа болх дӏахьош ба цига карарча хана. 14 шу хьалха хьалъяь из берий беш лоархӏамеча моттигех я. «Дезал хьаллацар» яхача моттигерча проекта «Дезал» яхача къаман проектага гӏолла дӏахьош ба из боккха болх Мистроя тӏадилла.
2026-ча шерара маьцхали бутт хьакхачале, чакхдала дезаш да деррига балхаш. Кердача куца тӏа йоалаяьча берий беша деррига гӏулакхаш йистедаьлча, ший хьаьший тӏаэцаш наӏараш хьаелларгья.
