Пӏаьраска денга кхаччалца, хий хургдац Шолжа кхалерча цхьайолча моттигашка
26.02.2026 09:23
Шолжа кхалерча Грозненски оалача урамера къаьнара, шоаш дуаргдар диа яьнна хин турбаш хувцаш боахк тахан болхлой. Из бахьан долаш, пӏаьраска денга кхаччалца хий хьадоагӏаш хургдац шахьарерча цхьайолча моттигашка.
«Сердалога» из хоам администраце зарбан болх лелабераша бир. «Болх дӏабахьа хий дӏакъовла дезаш хилар. Кхоана, Дала аьннадале, хий хьадолалургда, гӏулакх чакхдаьнна. № 6 йолча ишколагара Выгонни оалача урамга кхаччалца ор хьадаьккха, пластика турбаш ӏочуяхка боахк цига болхлой», - дийцар тха газетага.
Мэре белгалдечох, тахан латтар Рамадан бутт хиларах, къаьстта йоккха терко еш дӏахьош ба из болх, ма хулла сихагӏа чакхбаккха гӏерташ. Карарча хана машинаца хий дӏатӏакхухь бахархошта.
