Шолже дийцар 2026 шера ӏӏ-ча квартала АНК балха толамаш
Шолжерча наркотикашта духьаларча комиссе заседани йолаш, дийцар 2026 шера ӏӏ-ча квартала балха толамаш, яхаш, хоам бу «Сердало» газетага шахьара администраце.
Цига дакъа лоацаш хилар Россе МВД «Шолжера» МО, дешара урхаллен, «Шолжера ЦРБ» ГБУЗ викалаш, Юкъара кхел, дина викалаш. Керттера терко тӏаяхийтар гулбеннараша наркоманеца къовсам лоаттабара балха, кагирхошта юкъе унахцӏена вахара хьал хьакхоллара. Иштта дийцар «Шолжерча ЦРБ» ГБУЗ наркотикашца къовсам лоаттабара балхах хьахинначох, юкъарча дешара моттигашка наркотикашта духьалара хьехамаш дӏадахьарах.
Дӏахо комиссе доакъашхоша терко тӏаяхийтар шахьара дешара моттигашта. Кхетаче чакхйоалаш комиссе доакъашхоша лаьрхӏар боахамашца цхьана бувзам лелабе, семинараш дӏакхахьа, цу юкъе говзанчаш, бокъонаш лораераш, лораш, юкъарлон викалаш болаш.
Наркотикашта духьала къовсам лоаттабара йолча комиссе кулгалхочо Келаматанаькъан Танзилас белгалдир, комиссе доакъашхоша цхьана болх дӏабахьар, вай шахьара даькъ тӏара из ийрча гӏулакх юхатохара лоархӏаме долга.
