Шолжера урамаш тоаде лерхӏ
Гӏалгӏайчен Шолже, кӏеззига хаоттам тоабенначул тӏехьагӏа, Тухачевске урамах никъ тоабе болалургба, яхаш, дийцар «Сердало» газетага мэре зарбан болх лелабеча Батиганаькъан Хьавас.
«Цига жагӏа хьарцар дехаш, цхьан яхархочо кхайкарал даьчул тӏехьагӏа, доал деча даькъ тӏарча ӏаьдало гӏум-жагӏа вӏашагӏъувш никъ шаьрбир. Цо таро лу цу даькъ тӏара хьал кӏеззига аттача даккха.
Шахьара кулгалхочо ӏумаранаькъан Аслана декхар оттадаьдар из никъ тоабе, аьнна, бакъда догӏаш латтарах болх дӏабахьа йиш йоацаш бисар», - аьлар хоамо.
Тхога хоам баьчо яхачох, карарча шера лаьрхӏад цига хьалхарча орах тӏехвоалача тӏий тилла, иштта асфальт а булларгба Слепцовски урамах, гӏашлой никъ а бергба.
2027 шера тоабергба Заовражни-Жукова - №8 юкъера ишкола йола керттера урам. Цхьайолча моттигашка асфальт булларгба, гӏашлой наькъаш дергда, тока саьргаш дохийтаргда, урам тӏа сердал хургья, иштта шоллагӏча орах а тӏий тулларгда.
