Шолжа-Шахьарерча керттерча доазон тӏа, парке хувцамаш деш ба тахан
Осканаькъан Сулумбика цӏерах болча урама доазон тӏарча коммерчески моттига хьал меттадоаладеш болх ба, тахан Шолжа-Шахьаре дӏахьош. Из доазув, парка гонахьара моттиг дикка дӏашеръе, культуран Двореца гонахьа паргӏатагӏа хилийта, аьнна, деш хувцамаш да уж. Бизнеса доал дечо из доазув муниципальни гӏулакхашта дӏаденнад.
«Вай мехкадас Келаматанаькъан Махьмуд-Ӏаьлас тӏадилла, 2021-ча шера денз дӏаболабаь болх ба из. Цу юкъе шахьарерча администраце дукха моттигаш ший доалахьа ерзаеш, боккха болх дӏахьош, хувцамаш деш къахьийгад. Къаьстта лоархӏаме хилар,хьалхагӏа аттракционаш хинна 2 939, 2164 кв. метр доазув муниципальни доалахьа дерзадар. Парка моттиг дӏашеръеш, тоаеш болча балхаца лоархӏаме дар из. 2022-ча шера аттракционий парка чухьнахьара 100 кв.метрага кхоачаш йолча моттиге, хувцамаш деш болх дӏабихьар шахьаре. Цу шера парка дерригача доазон гонахьа карт оттайир, иштта культуран Двореца хьалхашкара доазув меттадоаладир. 2025-ча шера «Дагалоаттама, сийлен парке» хувцамаш дир, иштта керттерча доазон, культуран Двореца тӏабодаш бола урам тоабеш къахьийгар», - дийцар «Сердалога»
Шолжа кхален администраце. Карарча хана юкъарча доазон моттигаш, «Культуран Дворец» вӏаший хотташ хургйола йоккха архитектуран моартол хьаеш боахк болхлой.
2027-ча шерга кхаччалца, дӏахьоргба цу моттигий куц хувцаш бола болх.
