Шолже хилар «Стоматологи: дешар, Ӏилма, болх шаьрбар» яха кхетаче
Шолже дӀайихьар Ерригроссийски Ӏилман-балха кхетаче «Стоматологи: дешар, Ӏилма, болх шаьрбар» яхача лостамагӏа, из лаьрхӀа яр ГӏалгӀай стоматологически института Ӏилман болх хьаллацара, дегӀакхувлара, яхаш, хоам бу «Сердало» газетага цу моттигера.
Стоматологе даькъ тӀара лазараш даржаш хилар керттера моттиг дӀалоацаш да дувца оттадаьча дешашта юкъе. Из дувзаденна да Къилбаседа Кавказа анатоме, антропологе, мехкала-географе, этно-конституциальни баген, мочкхала-юхьмарий белгалонашца. Кхетачен доакъашхоша, цу юкъе Москвера, Селий мехкара, Ставрополера, ГӏалгӀайчера, Нохчий Респбуликера викалаш а болаш, хьежар цу деша моттигера кеп тахка, балха тӏа пайда хургбар кхолла. Ӏилма-тохкам, дешара хьал, иштта лазара дарба дар – уж кхо хӏама цаӏ санна дувзаденна хила деза царгий хьал талхаргдоацаш лоаттабеча къовсама юкъе.
Ше къамаьл деш, ГӏалгӀай стоматологе института ректора Тоачанаькъан Лидас белгалдир, таханара вӀашагӀкхетар стоматологе даькъ тӀа пайда бахьаш хиларах теша лов сона, аьнна. Цул совгӀа, укхаза даьха толамаш, цу балхаца ший вахар дувзадаьча сага накъадаргда аьнна хет.
УнахцӀенон министра гӀончас Угурчанаькъан Хаде белгалдир, хӀанз вай мехка дика дегӀадоагӀаш да паччахьалкхен - доалахьара болх цхьана лелабар, цудухьа ИСИ студентий таро хургья шоай балха говзалца унахцӀенон даькъ тӀа из дӀачӀоагӀде.
Кхетаче дӀахьош доакъашхоша дийцар стоматологе Ӏилмах, практиках, царна яйзар керда технологеш, иштта докладаш йийшар, тайп-тайпара хаттараш доашхаш.
