Шолже дӏабихьар «Веш Янданаькъан Жамалда» яха культуран дешара болам
Шолжа-Шахьара дагалоаттама, сийлен Парке; «Веш Янданаькъан Жамалда» яха культуран-дешара болам дӏабихьар. Кхетачено цу парке салоӏаш хиннарий терко тӏаэзар, уж дукхагӏа кагирхой, кхувш йоагӏа тӏехье яр. Из литературан проект вӏашагӏъеллар Гӏалгӏай Къаман библиотека яр, цо доаккхалца лелаю гӏорваьннача классика цӏи. Из кхетаче вӏашагӏъеллар, Гӏалгӏайчен халкъа поэт ваь 110 шу дузаш хилара чудоагӏаш.
«ГӏР НБ болхлоша болама доакъашхошта дийцар Гӏалгӏайчен лирика вахарах, цун кхолламах лаьца, цар цу парке боаржабир цунна хетабаь гойтам. Доакъашхоша дешар Янданаькъан Жамалдий поэзе мугӏараш, уж шоай тайпара хеталора, цу сатем лаьттача ардарча бетта дийнахьа ӏолегача гӏаьний татах. Дешаш хиннарашта юкъе сийрда белгало яр Шолжерча №3 йолча юкъерча ишкола дешархо Оздой Зара, цо йийшар гӏалгӏай меттала Янданаькъан Жамалдий массехк байт», - аьлар «Сердало» газетага Гӏалгӏайчен керттерча библиотеке.
Белгалду, укх деношка Къаман библиотеке ӏV-гӏа «Янданаькъанчун дешар хилар, цига Хамарзий Жамалданна хетаяь дӏайолайир юбилейни кхетачений лаьрххӏа программа. Цу дагалоаттама кхетачене хьайийллар культуран, дешара, ӏилма-тохкама массехк оагӏув, уж дӏахьоргья ерригача республике гӏолла цӏихезача гӏалгӏай классика сийна.
