Оагӏой бутт бовш, Осканаькъан Сулумбика цӏерах йола мехкагадаккхара лерхӏам бола моттиг хьаелларгья Шолжа-Шахьаре
Россе Турпала Осканаькъан Сулумбика цӏерах йолча мехкагадаккхара моттига болх карарча хана 80%-га кхоачаш кийча ба, ала йиш я. Укх шерара оагӏой бутт бовш, хьаелла лерхӏ из моттиг. Хьалхагӏа университет хиннача, тахан дикка тоаяьча 2,1 эзар км. гӏишлон чу дешара, спорта, тӏема-мехкагадаккхара йола урокаш хургья. Цу чу хьаелларгья «Феца гӏеттара академи» яха кабинет, топаш кхувса электронни моттиг, спорта лаьрхӏа зал, 120 моттиг луш йола актови зал, иштта 160 сага лаьрхӏа «цаӏ вокханга йоала» зал.
«Къаьстта моттиг дӏалоацаш хургда цига вай къаман истори. Сийлахь - боккхача Даьймехка тӏема шерашка Магӏалбик моастагӏий кара ца кхоачийташ, духьале яьрех довза йиш хургья «Магӏалбикера тӏом» яхача музее. Иштта тӏема гӏирсех йола парк цига хьаелларах дувцаш ба тахан, Россе герзашцарча низий Министерствоца. 14 шергара 35 шерга кхаччалца болча къонабарашца, болх беш хургба цига. Цу юкъе ба дешархой, студенташ, иштта кхыбараш. Цига цар аьттув хургба дукха хӏама довза, дешара программашта юкъе дакъа лаца, спортаца бувзам лелабе. Лакха майрал, денал гойташ вахар хаьдача Россе Турпала Осканаькъан Сулумбика цӏи цу моттигах тиллар а, ший кӏоарга маӏан долаш да. Вай къонача тӏехьенна бовза беза иштта бола Даьхен къонгаш, царна карагӏдаьннар диц ца деш хила еза», - аьлар вай мехкадас Келаматанаькъан Махьмуд-Ӏаьлас.
«Кагирхойи бераши» яхача къаман проекта «Къонабарий мохк» яхача федеральни программага гӏолла дӏахьош, боккха болх ба из. Кагирхошта лаьрхӏа йиъ моттиг хьаелла аьнна вай республике хьахьожадаьр 200 млн сом рузкъа да. Наьсаре дукхача оагӏонех йола моттиг хьаеллаш, Жӏайрахьа кхале хьаьша тӏаэцара лоамарой Цӏа, иштта Дошлакъий-Юрта кулгаговзала балхех йола парк хьаеллаш, къахьегаш ба мехка.