Гӏалгӏайчен Шолжа кхале банка чота тӏара ахча дахьарах дола гӏулакх хьадийллар
Шолжерча полице даькъа уголовни тохкама болхоша хьем боаццаш лахара кхетаченаш дӏайихьар къоал хилар гучадаккхара. Цига, бокъонаш лораерашта ховш хилар моттигерча яхархочо ӏаьдала ахча лочкъадаь хилар. Ший гаргара саг венначул тӏехьагӏа, цо ӏаьдалах къайладаьккхар из. Из бахьан долаш, страховой пенси цу кхалсага хьаийдеш хилар. Цо из дӏадахийтар ший гӏулакха. Хӏанз их бахьан долаш, из суда хьалхашка жоп дала дезаш я.
«Тохкама болхлошта гуш хилар, 2025 шера оагӏой бетта 27 ча дийнахьа Гӏалгӏайчен Шолжа кхален Алхасте, «Страховой пенсех» 2 п. 2 д. 25 ст. Федеральни закон толхадеш, ший маьр-веший ахча ший доалахьа дерзадара, Тамбовски областа Россе вахара страховане пенсионни Фонда отделене цо хоам баьбац ший гаргара саг валарах. Цун банка карта леладеш, цу тӏара ахчаш дӏакхухьаш хиннад. 2026 шера, наджгоанцхой бетта ӏ ча денгара, бекарга бетта 30 денга кхаччалца цо лочкъадаьд 70 эзар сом», - аьлар «Сердало» газетага Гӏалгӏай Республике гӏолла йолча Россе МВД зарбан болх лелабераша.
Карарча шера ардара бетта 5-ча дийнахьа, Россе МВД «Сунженский» МО тохкама даькъо хьадийллар уголовни гӏулакх. Цу кхалсага бехк бу РФ УК пункт «г», дакъа 3, статья 158, из доагӏаш да банка чота тӏара ахча лочкъадарах.
Из гӏулакх тохкаш ӏаьдала болхлой дӏахо болх дӏахьош ба. Цар лаьрхӏар хиннар ма дарра довза.
