Гӏалгӏай мехка бетта дӏахьоргба наркоманена духьалара болх
Гӏалгӏайче дӏаболабир наркотикашта духьала къовсам лоаттабара болх. Укх бетта хьехама кхетаченаш дӏахьоргья, наркотикаш йоаржаяра хьал юхатохаш, Ерригроссийски болам дӏахьош хилара чуйоагӏаш, яхаш, дийцар «Сердало» газетага республикан министрий кабинета зарбан болх лелабераша.
«Бӏарчча бетта дешара моттигашка, культуран урхалленашка, республикан спортивни центрашка дӏахьоргья тематически кхетаченаш, спортивни гулламаш. Уж лаьрхӏа да наркоманеца къовсам лоаттабара, из ийрча хьал юхатохара», - аьлар хоамо.
Карарча хана, ГӏР тайп-тайпара наркологически тӏахьожам лоаттабеш 1750 саг ва. Дӏадахача шерага хьежача, цу унзарча мугӏаре латтараш кӏеззига лаьгӏбеннаб, из карагӏдаьннад массайолча оагӏорахьара чулаьца хьехама болх дӏабахьарах.
Дукхагӏча даькъе наркотикаш йоаржаю Интернете гӏолла. Царна тӏахьожам лоаттабу говзанчаша. Цу тайпара зуламаш леладу нах хьалувца а, юхатоха а беза. Доккха дакъа дӏалоац, наха из хьал довзийташ, болх дӏахьош хиларо.
Белгалду, цу тайпара кхетаченаш дӏахьоргья Гӏалгӏайчен ерригача юрташка, шахьарашка, кхаленашка.
