Эбарга-Юртарча №1 йолча ишколе дӏадихьар Россе къамий меттай Ди
Россе къамий меттай Ди долаш, Гӏалгӏайчен Шолжа кхален Эбарга-Юрта №1 йолча ишколе цӏай дездеш кхетаче хилар. Цига вӏашагӏкхийтар вай къаман культуран тӏехьале лорае, из совъяккха ловш бола къахьегамхой. Цӏай дӏадихьар безаме, къаьга. Цига белгалдир гӏалгӏай меттацара лерхӏам, культура, искусствон низ боккха хилар.
«Сердало» газетага из болх вӏашагӏбеллараша ма аллара, цӏай сийрдадоаккхаш яр цига кийчъяь хинна концертни программа. Шоай начӏалца гулбеннарий самукъадаьккхар Эбарга-Юртарча культуран Цӏен къонача солисткас Хаьшанаькъан Иманас, Дале. Уж дукха тӏоараш детташ, гулбеннача наха хоза хеташ тӏаийцар.
Иштта сапаргӏата доаккхаш яр «Сийг» яхача ансамбло гойта хоза, кийчъя халхарий оагӏув. Къонача халхарчаша гойтар лакха говзал хилар; халхара хоза оагӏонаш, боккха мах оттабеш, тӏаэцаш бар гулбеннараш а.
Республикан культуран болхлоша цу кхетачен терко тӏаяхийтар. Безача хьаьшашта юкъе яр Гӏалгӏайчен халкъа кхоллама Республикански Цӏен исбахьаллен кулгалхо Абдурзаканаькъан Аьсет, цо дика хьаллоац къона начӏалаш.
Цу тайпара цӏай дӏахьош хиларо лоарххӏаме гӏа боаккх къамашта юкъера барт чӏоагӏбара, кхувш йоагӏача тӏехьен лерттӏа кхетам балара, царна шоай культура, тӏехьале йовзийтара, цул совгӏа дешара моттигаш, культуран институташ шоайла дикагӏа бувзам лелабеш хул.
