Лаьца воалла саг ший цӏен гаргагӏа йолча набахта хьавоалаве гӏо дир УПЧ
Сага бокъонех волча викалага дехар дир вай мехкахочо; набахта воалла ший воӏ цӏен гаргагӏа йолча набахта хьавоалаве гӏо де шийна, аьнна.
«УПЧ дехар чуденнача кхалсага воӏ лаьца воаллар Самарски областерча Россе УФСИН набахта. Цӏагӏара таро дика цахиларах, цу гаьнарча моттиге цунна тӏехьааха чӏоагӏа низкъала дар цу наха.
Лаьца воаллачун нанас дехар дир; ший гаргара нах бахача Ставрополе из хьавоалаве гӏо де шийна, яхаш. Дикка аттачахьа доалар цар хьал тӏаккха, хан-ханнахьа лаьца воаллар волча аха а аьттув хулар», - дийцар «Сердалога» республикерча УПЧ.
Сага бокъонех волча викало, Федеральни оагӏонцарча болхлошца бувзаме ваьнна, техкар из гӏулакх. Къахьийгачул тӏехьагӏа, Ставрополерча набахта дӏахо ха такха хьавоалаве аьттув баьлар из саг.
Чӏоагӏа лоархӏаме да лаьца воаллача сагаца цӏагӏарча наха бувзам лоаттабар, хан-ханнахьа тӏехьаболхаш хилар, хӏаьта мехка гаьна йоацача моттиге саг хьавоалаве аьттув хиларо дикка аттача доаккх из гӏулакх.
