ГӀР УПЧ новкъостал дир бера-заӀапхочун, цун дезала бокъонаш лораеш
ГӏалгӀайчен сага бокъонех викал волча ера, заӀапхо-бер кхедеш йола дукхача берий нана. Ший лоткъам тӀа цо язду, ший дезала ахчан хьал толхадаь хилара бахьан малагӀа да, иштта белгалду кхувш йоагӏача йиӀига бокъонаш телхаеш хилар. Нанас хоам бир, вахара пенси хьадалара гӀулакх соцадаь латта дукха ха я, яхаш. Цун бахьан да, из яхаш йола моттиг чӀоагӀъяь цахилар. Уж дезал республике бахаш а, вахара новкъостал эшаш а хиларга хьажжа доацаш, духхьал регистраци цахиларах йиӀига доагӏаш дола ахча соцадаь латт. Из кхалсаг цкъа яха Ӏийнаяц Россе Вахара ганзе, пенси хьадоладаларга сатувсаш, бакъда мел кхайкарал дарах, из хьал меттагӏдоалаш дац.
«Сага бокъонех волча викала, из гӀулакх дика дайзачул тӀехьагӀа, цун боагӀаш бола бокъоний мах оттабар хьадийхар тӀахьожам лоаттабеча моттигашкара. Цу тайпара, Волгограда-Шахьара Кировски кхален прокуратуро, викала кхайкаралах дӀабихьача балха даькъ тӀа белгалдир, СФРа отделене МВД органашка цу гӀулакхага хьажар хьадийха хиннадале а, бер хиларах лаьрххӀа бола хоам геттара тӀехьа хьакхаьча хилар.
Цу юкъе, заӀапхо-бер цу ерригача хана, Российски Федераце доазон тӀа дахаш хиннад. Бера бокъонаш бӀарчча меттаоттаяра, прокуратуро кхален суде лоткъам дӀабахьийтар, Вахара ганза отделенена боагӀаш. Цу тӀа хьадех, из бер массахана Российски Федераце доазон тӀа дахаш хилар дӀа а лоархӀаш, ганз декхарийла оттаяр, цу ерригача хана доагӀаш дола, хьа ца луш латта ахча хьадаккха, 2024 шера маьцхали беттагара 2025 шера ардара беттага кхаччалца»,-аьлар «Сердало» газетага ГӏалгӀай Республикан УПЧ хоамий-аналитически даькъ тӀа.
ГӏалгӀайчен сага бокъонех вола Викал цига юкъеварах, из чоалхане хаттар кхоачашде таро хилар. Таханарча дийнахьа кхувш йоагӀача йиӀига еррига вахара бокъонаш меттаоттаяра хаттар суде тохкаш да.
