Махьмад-Хи тӀарча №2 йолча ишколе экстремизмах, терроризмах дийцар
Махьмад хи тӀарча №2 йолча юкъерча ишколе кхетаче дӀайихьар экстремизма, терроризма профилактика еш. Дешархошца къамаьл деш дакъа лоацаш вар МагӀалбика кхален терроризма духьаларча комиссе викал Джамболатанаькъан Мухьмад, Махьмад-Хи тӀара кулгалхо Гӏазданаькъан Бадрудин, дин викал Джанхотанаькъан Гирихан. Кхетаче дӀахьош хилара бахьан дар, дешархошта нийса никъ хьехар, терроризмах, экстремизмах хьадоала зулам царна довзийтар, уж цох лорабар, иштта цу бӀехача гӀозара юкъеваьннар уголовни таӀазар доацаш вутаргцахилар.
«Къамаьл деш берашта довзийтар терроризмах хьадоала зулам, из юкъарлон а, паччахьалкхен а, хӀара сага а унзара хьал хилар. Джамболатанаькъан Мухьмада терко тӀаяхийтар Российски Законах, цу воча гӀозара юкъебаьннараш доагӀаш дола таӀазар доацаш бусаргбоацилга.
Дин викала Джанхотанаькъан Гирихана белгалдир, экстремизма юкъевалар бусалба динца доагӀаш цахилар, цо тӀахьийхар кагирхой шоаш Ӏехацабайтара, шоаш леладеча хӀаман тӀехьа бехктокхаме хилара.
Юртдас Гӏазданаькъан Бадрудина белгалдир дешархошца цу тайпара болх дӀабахьар лоархӀаме хилар, дешархошта хьалхадаьккхар уж сакхетаме хила безилга, шоаш зулама юкъе ца бигийта терко лоаттаеш хила безилга, нагахьа санна дегабуам беш дола хьал нийсденна хуле, боккхагӏчарга кхайка беза», - аьлар «Сердало» газетага МагӀалбика кхален администраце зарбан болх лелабераша.
Кхетаче дӀайихьар, шоайла къамаьл деш. Дешархошта довзийтар дукха хаттараш, хьалхаяьхар харцахьарча наькъ тӀа вугаш йола оагӀонаш. Из болх вӀашагӀбеллараша нийса даьшхар хӀара хаттар, иштта бераша луш долча хаттарашта а жоп делар. Хьалхадаьккхар экстремизмах, терроризмах лоравалар, из паччахьалкхен а хӀара сага а юкъара декхар да.
