Кердача хьисапе къахьегаш ба тахан, Гирети яхача ширача юрта
Кердача тайпара болх дӏахьош ба тахан Гирети яхача гӏалай юрта, Крупнов Е. цӏерах йолча археологически оагӏон керттерча ӏилман болхлочо Тӏонганаькъан Мухьмада кулгал деш йола тоаба. Кердача тайпара дӏахьош болча балхо кораяь хӏамаш талхийтац. Из хоам «Сердалога» бир «Тӏехьале» яхача гӏалаш меттаоттаярах йолча ишкола болхлоша.
«№ 3 йолча малхарча каша кӏалхарча гӏата чура корабир цхьа тӏормиг – корадаьр № 74. Тӏормига моттигаш йийлла йитар, кӏадо садоахаргдолаш, хӏаьта каьхата хӏамаш къаьсттача хӏаман чу ехкар, талхаргйоацаш.
Дӏахо, лабораторера болх йистебаьлча, кораяь хӏамаш дикка цӏенъю, тӏаккха из фу кӏада да, малагӏча ханашкара да, эггара хьалхара бос мишта хиннаб тахка, аьнна, болхлошка дӏакхоачийт, деррига дӏаязду», - белгалдир Тӏонганаькъан Мухьмада.
Археологаша белгалдечох, беррига болх, хӏара гӏулакх ше-ший аргӏанца, боаггӏача боараме дӏахьош хиларо корадаьраш дикагӏа довзийт, лорадайт.
