Яндаре дагалаьцар къона Гӏалгӏайчен турпал Дербичанаькъан Хизар
Наьсарен кхален Яндарерча культуран Цӏагӏа «Зӏамига турпал» яха Денала сахьат дӏадихьар. Из хетадаь дар республикан къонача вахархочунна Дербичанаькъан Хизара. Кхетаче вӏашагӏъеллар кхувш йоагӏача тӏехьенна из турпала гӏулакх довзийтара, цар дагалоаттам кердабаккхара.
«Кхетаче дӏахьош хиннача культуран Цӏен исбахьален кулгалхочо Йовлой Мадинас дийцар, бархӏ шу даьннача кӏаьнка деналах. Цунна карагӏдаьннар ерригача республиканна меттел, цул арахьа а дукхача наха дӏахезар. Йовлой Мадинас белгалдир, къонача турпалхочо, ший вахар кӏал а дита, новкъост кӏалхарваккха из хьажарах, Даькъастен къамий цхьоагӏо хилар гойташ дар из», - аьлар «Сердало» газетага культуран-салоӏама моттиге.
Къаьстта терко тӏаяхийтар цига; цу тайпара денала, турпала гӏулакхаш диц ца деш, дагалоаттадара. Йовлой Мадинас белгалдир, Дербичанаькъан Хизира карагӏдаьннар кӏоаргга чулоацам бола гӏулакх долга, цо ӏомаду тӏехьа тӏадоагӏа ноахал денал долаш, граждански лакха бехктокхам болаш хила, шоай хьамсара лаьтта деза.
