Бӏаьстан ха хьаоттарца, хишта юхера бердаш цӏенде арабоал вай мехка
Хишта гонахьарча моттигашка лостам беш бола болх дӏаболалургба вай мехка, бӏаьстан хьалхара бутт хьаоттарца. Из хоам «Сердалога» бир Мехкадаь зарбан болх лелабераша.
«Экологе шу да аьнна хьакхайкадаьд вайцига 2026-гӏа шу. Хин гонахьенашка лостам барал совгӏа; дешара, культуран, юкъарлон оагӏонцара кхетаченаш дӏаяхьа лерхӏ республике. Укх тӏехьарча шерашка экологен хьал лорадарах дола боламаш бахархоша геттара дика хьаллоацилга зийнад мехка. Россе Президента юкъебаьккха «Россе хиш» яха болам боаржабераш хӏара денна дукхагӏа хулаш латт. Дика толам боаккх ала йиш я цу оагӏонца вай республике», - аьлар Мехкадас Келаматанаькъан Махьмуд-ӏаьлас.
«Россе хиш» яхача ерригача Россе боламга гӏолла цӏенъе лерхӏараш 280 километрага кхоачаш йола хин гонахьара моттигаш я. Царех я Наьсара, Эсан, Шолжа, ӏарамхин, Сурхохин, Ачалкха, Кенча моттигаш; иштта Наьсарера, Илдарха-Гӏалий тӏара ӏамарч цӏендеш къахьегаргда мехка. Хӏара шера из беркате гӏулакх хьаллаца арабоал студенташ, дешархой, Даьла духьа гӏо деш лелараш, тайп-тайпарча моттигашкара тоабаш, ӏаламах дог лазаш бола бахархой. Вай Мехкадас белгалдир, Дала хьаденна хоза, беркате ӏалам лораде дезилга, шийна тӏехьа, хин йистошка, хьун моттигашка нувхаш йита дӏааха йиш йоацилга. Бераш дӏаӏомаде деза боккхагӏчар ӏаламца лерхӏам лелабе.
