Подмосковьерча санаторе могашал меттаоттаеш хургва вай мехкара СВО доакъашхо
Подмосковье яхача шахьарерча санаторе ший дегӀа могашал меттаоттае ваха аьттув баьлар СВО ветерана Оздой Ӏаддал-Керама «Даьхен лорабой» яхача ганзага гӀолла. ТӀема операце доакъашхошта, салоӀаш, меттабахка новкъостал ду ганза мехкарча филиала болхлоша.
«2023-ча шера Украине вахар Оздой Ӏаддал-Карам. МугӀарера бӀухо волаш Херсонски, Лугански областашка тӀема декхараш кхоачашдеш лаьттар из. Санаторе ваха гӀо де шийна аьнна вера из, ганза болхлой болча. Буружанаькъан Хаде новкъостал дир цунна, деррига каьхаташ кийчдеш. Московски областерча М. Горьке цӀерах йолча санаторе салоӀаш хургва бӀухо.
Белгалде деза, из санатори дика лоархӀаш йолга. Дега, нервашта, дерригача дегӀа дарба дергда цунна цига», - дийцар «Сердалога» «Даьхен лорабой» яхача ганза болхлоша. ЧӀоагӀа раьза волаш, дега тоам хинна вар ветеран ший гӀулакхага иштта хьажарах.
