СВО ветерана хьалхадаьккхар МагӀалбика дешархошта, во гӀулакх доаржадар кхераме долга
МагӀалбикерча №20 йолча ишколе экстремизма, терроризма духьалъоттарца бувзабенна дешархошта кхетам балара болх дӀабихьар. Из лаьрхӀа бар дешархоша кхерамзлен хаттараш дикагӀа кхетадергдолаш, цар вахар нийса хургдолаш.
«Дийцача къамаьла юкъе керттердар дар Россе тӀема лаьрххӀача операце бӀухочо Ахкилганаькъан Адама дийцар. Цо берашта довзийтар ший вахаре нийсденнараш, шийна хьалхашка этта хинна чоалхане тӀема никъ. Геттара чӀоагӀа терко тӀаозаш дар цо дийцар - ше Ӏоажала кӀалвисача хана нийсденнар. Къаьстта цу хана хайра цунна мел мах ба вахара», - яхаш дийцар «Сердало» газетага МагӀалбик-Шахьара администраце зарбан болх лелабераша.
Дешархошка кхайкарал деш, Ахкилганаькъан Адама аьлар кӀоаргга чулоацам бола дешаш: «Вахар - из вай мел долча хӀамал лакхагӀа мах бар да. Лораде из, уйла а йийя де хьажа деш дар, ка ма ле шоаш цу бӀехача гӀозара юкъедига экстремизма, терроризма». Уж дешаш дег чу дийшар дешархошта. ДукхагӀчар уйла тӀаяхийтар, мел лоархӀаме да царна тӀехьацавалар.
СВО ветеран воацаш а, кхетаче дакъа лоацаш хилар дин викалаш, цар белгалдир вахара нийса оагӀонаш лелаяр, къахетаме хилар, тайп-тайпара культураш лоархӀаш, дин нийса леладеш хилар лоархӀаме долга. Иштта шахьара администраце болхлоша терко тӀаяхийтар закон лорадеш, хӀара сага хьалха бехктокхаме волаш, юкъарлон кхерамзле лораеш хила везилга.
Къамаьл деш, дешархоша хьаьшашка хаттараш делар, мишта довзаргда экстремистий гӀулакхаш, мичахьа кхайка веза чоалхане хьал нийслойя, мишта вӀашагӀдохка деза дукхача къамашцара, тайп-тайпара ди лелаберашцара гӀулакхаш.
