Могашал меттаоттае гӏо дир СВО ветерана Оздой Бек-хана
20.01.2026 09:08
Анаперча санаторе ваха, ший дегӏа могашал меттаоттае гӏо дир СВО ветерана «Даьхен лорабой» яхача ганза болхлоша. Из хоам «Сердалога» бир ганза мехкарча филиала кулгалхочун гӏонча йолча Джанхотанаькъан Мадинас.
«Оздой Бек-хан, тӏема декхараш кхоачашдеш, когашта човнаш хулаш лозаваьвар. Санаторе ваха дарба де дезача хьале вар Даьхе лораеш лаьттар. Ганза болхлочо Тиймарзанаькъан Луизас эшаш мел дола каьхаташ гулдеш болх дӏабихьар. Ше вахача моттигерча лора из дӏатӏахьожаваь, эшаш мел долчунга хьежа, Анаперча «Кристалл» яхача санаторе ваха путёвка вӏаштӏехьаяьккхар цо, моттигерча вахара оагӏонцарча ганзаца бувзаме яьнна», - дийцар тха газетага.
