СВО ветеранаша денала урок елар Илдарха-Гӏалий тӏарча дешархошта
СВО ветеранаш, «Даьхен лорабой» ганза республикерча филиала викала Темарханаькъан Ӏийсас Илдарха-Гӏалан №6 йолча ишкола дешархошта денала урок елар. Кхетаче дӏахьош хилара маӏан дар, кхувш йоагӏача тӏехьенна ший исторега гӏолла Даьхен хьалхашка бехктокхаме хила езилга гойтар, иштта ший мохк безаш хилар цунна хьалхадаккхар. Цу тайпара дийна къамаьл дӏахьош хиларо дешархошта новкъостал ду кӏоаргагӏа довза шоай Даьхе езара маӏан.
«Кхетаче дӏахьоча дакъа лоацаш хилар СВО ветеранаш Евкуранаькъан Микаил, Оздой Махьмуд, Хазанаькъан Ӏаьла, иштта веннача бӏухочун Гетагӏазанаькъан Вахий да Мухьмад, волонтёр Оздой Рамзан. Кхетаче дӏайихьар шоайла къайле йоаца къамаьлаш деш. СВО бӏухоша берашта дийцар тӏем тӏарча хьалах, тӏема доттагӏалах, халача хьалашка шоайла тӏаотташ хиларах. Къаьстта терко тӏаяхийтар цӏагӏара боагӏа хоам боча хилара. Бӏухоша белгалдир, берий каьхаташ, сурташ, шоай дег тӏа дехкаш, бӏухоша лорадеш леладеш хилар. Дешархоша боккхача теркамца ладувгӏар царга, шоай хаттараш дора. Фу яхилга да Даьхен бӏухо, фу де деза тӏем тӏа унзара хетаргдоацаш, коталон тӏехьа хургволаш, шоай мехка малагӏа новкъостал дича бакъахьа да шоаш яха хаттараш дар цар деш хиннараш», - аьлар «Сердало» газетага «Даьхен лорабой» ганзе.
Бӏухоша массадолча хаттарашта хоадам боллаш жоп делар. Хьаьшаша хьалхадаьккхар дешархошта цар керттера декхар; дика дешар, боккхагӏбараш лархӏар, шоай мехка истори довзар, мохк безар да, аьнна.
Цу тайпара кхетаченаш дӏаяхьар лоархӏаме да кхувш йоагӏача тӏехьенна. СВО бӏухошца бувзам лелабаро берашта таро лу вайна юкъе бахаш бола турпалхой бовза, вахара мах чӏоагӏбе.
