Гӏалгӏай политехнически колледж тоаеш дӏабихьача балхага хьежар Надыкто Владимир
Ӏарпенаькъан Ювсапа цӏерах йолча политехнически колледжага хьажа ваха хилар Россе Президента СКФО викала гӏонча вола Надыкто Владимир. Колледж тоаеш дӏабихьача балхага хьожаш, студенташ тӏаэца кийча хилар малагӏча боараме да теркалдеш хилар хьаким.
«Деррига балхаш чакхдаларгахьа кхаьчад. Хин, йӏовхала турбаш хувцаш, токаца дувзаденнараш хувцаш, тӏера а чура а дикка кулг тохаш, хувцамаш деш къахьийгад цига. Иштта боккха болх дӏахьош, хьалхара тоаеш я из колледж. Аудиторешкара, лабораторешкара, пхьоаллешкара кхоачам хувцаш; лекцешта, кхыдолча балхашта лаьрхӏа йола кабинеташ таханарча ханага хьежжа меттайоалаеш къахьега лерхӏ», - йоах «Сердалога» мехкарча Паччахьалкхера бенача хоамо.
Республикан кулгалхоша теркалду, дешара моттигашкара хьехархой массахана шоай балхацара говзал лакхъеш, шоай хӏама тоадеш хила безилга. Геттара хоза тоаяь, эшаш мел дола хӏама чудолча колледже тайп-тайпарча оагӏонашцара говзал караерзае аьттув ба студентий.
