Къаман проекташка гӏолла къахьегаш ба Илдарха-Гӏалий тӏара хьакимаш
26.02.2026 16:42
Муниципалитета дакъа лоацаш мел йола къаман проекташ йоаржаеш, къахьегаш ба Илдарха-Гӏалий тӏа.
Къаман проекташка гӏолла болх дӏахьош; наькъий, экономически оагӏонцара хьал меттаоттаде аьттув баьннаб шахьаре.
2019-ча шера денз «Гӏишлош, шахьарера вахар», «Кхераме доаца дика наькъаш», «Вахаре эшараш» яхача проекташка гӏолла шахьарера 22 моттиг тоае аьттув баьннаб. 21 км кхоачача доазон тӏа асфалтобетона никъ ӏобиллаб, иштта гӏашлой наькъаш даьхкад 17 км кхоачаш, 24 км кхоачаш керда лампаш йогӏаш хувцамаш даьд.
Укх тӏехьарча шин шера «Илдарха-Гӏала - Яндаре» яхача наькъ тӏа 48, 23 метраг кхоачаш машинашта лаьрхӏа ши тӏий тоадаьд, 12 метрага кхоачаш дӏашербаьб из никъ, кхерамзлен хьал меттаоттадеш.
