Шахьарера доалахье лораяр дех бахархошка Наьсарен кулгалхоша

«Дукха ха яц шахьарерча ӏама гонахьара моттигаш хоза хувцамаш деш тоаяь, бакъда хӏанзле бурчолгаш, гӏандаш, иштта кхыйола хӏамаш йохае болабеннаб, хӏаман хьисап деш боацараш, хам цабераш. Бахархошта ха дӏаяхьа, салоӏаш багӏа кийчъяь моттигаш толхаергьяц ший къаманца, мехкаца лерхӏам боацаш, дер дайна лелараша мара. Сага хьийга къа доадар, хӏама дохадар эггара ийрчагӏа йола оамал я», - дийцар мэре.

Шоай дезалашца, берашца арабаьнна; цӏенача фега ха дӏахьош лела аьттув хургболаш,  боккха болх дӏахьош, дукха рузкъа дӏатӏадохийташ меттайоалаяь моттигаш я уж. Боккъал а ма хила хӏама толхадерех, ийрчадоаккхарех, кӏеззига уйла е оашош леладеча хӏаман, яхаш, кхайкарал ду шахьара мэре.

«Массанега а дехар ду: нагахьа иштта дола хӏама оашош зийнадале, юстара ма ӏе! Цхьана болх дӏахьош мара соцалургбац вайна; эхь, юхь доацаш; къаман хӏама толхадеш лелараш», - аьлар мэра гӏонча волча Буражанаькъан Адама.