Наьсарен кхален хьакимаш, Сурхо тӏарча юкъарлон доакъашхой цхьана болх дӏабахьа лаьрхӏа ба
Наьсарен кхален администраце кулгалхо Овшанаькъан Мухарбик Сурхо тӏарча юкъарлон оагӏонцарча доакъашхошца кхетаче дӏахьош хилар. Юрта хьалхашка латтача кхоачамбоацарех, эггара хьалхарча аргӏагӏа кхоачашде дезарех дийцар гулбеннараша.
«Бахархошта, дукхача хана денз, къувлараш малагӏаш да белгалдир цига. Цу юкъе дар наькъий, ӏамай хьал, юртарча моттигашка кулг тохар, тикашта юхе машинаш ӏоувттаеча моттигашка хьажар, иштта бахархоша шоашта ловча тайпара лаьттан доазош дӏалувцар. Овшанаькъан Мухарбика шо-шоай гӏулакхех болча хьакимашта тӏадиллар кхоачамбоацараш юстардоахаш болх дӏабахьар. Бахархошкара тӏалатташ долча дехарашта терко еш, кхоачамбоацараш меттадоаладара тӏехьа хӏара денна къахьгаш хила безилга белгалдир цо», - йоах «Сердалога» Наьсарен кхален администрацера кхаьчача хоамо.
Белгалде деза, хьакимашта, бахархошта юкъе иштта кхетаченаш дӏакхухьаш хилар лоархӏаме долга, хӏана аьлча царга гӏолла дикагӏа гучадоал наха къувлараш, цар сатем боабаьраш. Вӏаший бувзам хиларо дикка пайда бу.
