Наькъ тӏарча хатара бехке вола мехкахо бехктокхаме эзав
19.12.2025 10:10
Ши саг лозавеш, хиннача наькъ тӏарча хатара бехке вола машин лоаллаш ваьгӏа мехкахо бехктокхаме озаргва ӏаьдало. Из хоам «Сердалога» бера МВД болхлошкара.
Дӏабихьача тохкамах, Лада «Гранта» яхача машинаца Херсонски оалача ураме гӏолла ӏовоагӏаш хиннар, вӏалла уйла е ца отташ, дӏачухьайзав Нурадилова оала урам болчахьа. Кхыча машинаца вӏашкакхийтта, ши саг лозавеш хатар эттад цига.
Шоллагӏча «Гранта» машина чу яьгӏа 16 шу даьнна йиӏиг, машин лоаллаш ваьгӏар дарбанче ӏочубигаб.
РФ УК 1-ча даькъа 264-ча статьях гӏулакх хьадийллад бехке волчунна духьала Россе МВД «Магӏалбик» яхача МО Тохкама оагӏонцарча болхлоша. Вахача моттигера аравала йиш йоацаш, бокъо йийхкай цунна карарча хана.
