Къамашта юкъерча лорий конгрессе дакъа лоацаш хилар вай мехкара лор
Вай мехкара наькха улга кӏалхарча маьженашта дарба ду хирург Имагожанаькъан Йоакъап Къамашта юкъерча «Кардиоторакальни хирургеца тахан даьржарашта юкъе лоархӏамедараш» яхача XV конгрессе дакъа лоацаш хилар. Санкт-Петербурге дӏайихьар из лоархӏаме кхетаче.
Укх бетта 25-ча денгара 27-ча денга кхаччалца цига гулбенна хилар Китаера, Германера, Францера, США, Кореера, Бразилера, иштта кхыдолча мехкашкара торакальни хирургеца къахьегаш бола говзанчаш. Лорий ӏилман доктор, Къоастой Х.И. цӏерах йолча ГБУ РЦФП керттерча лора гӏонча волча торакальни хирурга Имагожанаькъан Йоакъапа «Цаӏ мара йоацача пехка телха моттиг дӏаяккхар, гойтам, техника, де карагӏдоалар» яха доклад йир цига.
Пехкашта хулача лазарашта дарба дара юкъедаьннача кердадарех, иштта ший балха тӏа нийсденнарех дийцар вай мехкахочо цу йоккхача кхетачене. Гулбеннарашта боккха пайда луш моттиг хилар цох, хӏана аьлча дуккхадараш дӏа-хьа эца, довза аьттув бар иштта», - йоах «Сердалога» кхаьчача хоамо.
