Мехкара керттерча наькъех цаӏ тоабара шоллагӏа аргӏа дӏайолаяьй
«Илдарха-Гӏала-Яндаре» яха никъ тоабеш латт тахан вай мехка. Юххьанцара болх йистебаьккха баьнна, шоллагӏча даькъ тӏа баьннаб къахьегамхой. Из хоам «Сердалога» бера мехкадаь зарбан болх лелабечаргара.
«Россе Президента Путин Владимира юкъеяьккхача къаман проектага гӏолла, дӏахьош ба из болх. 30 км наькъаш да укх шера меттадоаладе лерхӏараш»,- белгалдир вай мехкадас Келаматанаькъан Махьмуд-ӏаьлас. Дӏадахача шера 11 километри 700 метри йолча наькъашцара 8, 5 километрага кхоачаш никъ йиллача ханал хьалха тоабе аьттув баьлар вай мехка. Карарча хана йиса хиннача 3,2 км наькъаш тӏа къахьегаш боахк болхлой.
100%-га кхоачаш тоаяь хургья уж моттигаш, Даьла къахетамца. Илдарха-Гӏала, Яндаре вӏаший хотташ бола никъ ба тахан бувцар. Цу оагӏонцарча хьакимаша лакха тӏахьожам беш дӏахьош ба болх. Проекта юкъе да гӏаш болхарашта къоастадаь доазош, наькъашкара бокъонаш йовзийташ йола гӏармаш, машинашка хьежача наха йола кхоаленаш. Маьтсела бутт хьакхачале, йистебаккха лерхӏ болх.
