Дешархой болча баьхкар драматически театра артисташ
Цагарели Авксенте пьесах «Ханума» яха спектакль гойташ хилар Гӏалгӏай паччахьалкхен драматически театра актёраш, Наьсарерча № 6 йолча ишколе.
«Пушкина карта» яхача федеральни программага, «Дешархошта лаьрхӏа культура» яхача дешара проектага гӏолла дӏахьош болх бар из.
«Ханума» яха комеди дукхача хана денз вай бахархошта езаеннарех я. Гуржий вахарера гӏулакхаш шоаш ма дарра хьажархошта бӏаргадайта аьттув баьлар актёрий шоай говзалга гӏолла», - дийцар «Сердало» газетага драматически театра болхлоша.
Дукхагӏа бола дешархой хьалхара хьожаш бар театральни спектаклага. Чӏоагӏа раьза долаш, актёрий дог ураоттадеш, кхестар бераш цига.
Иштта йолча сайренашка гӏолла театраца дувзаденнараш довза аьттув боал вай берий, цу тайпарча наькъаца безалу царна цу оагӏонцара кхоллам а.
