Гӏалгӏайчен исторически тӏехьале лораераша къахьегама шоатта дӏадихьар Магасе
Жӏайрахьа-Ахабоарзен паччахьалкхен историко-архитектурни ӏалама музея-заповеднико, Гӏалгӏайчен паччахьалкхен культуран тӏехьален моттигаш лораяра Комитето цхьана Магасе къахьегама шоатта ди дӏадихьар. Кхетачен доакъашхой арабаьлар гонахьара доазув цӏенде, цар лостам бир гӏашлой лелача моттигашка, офиса гонахьара доазув цӏендир, йокъаенна баьцаш, гӏаьнаш дӏадаьхар, баьццара доазув тоадир.
«Тхо дег чура тешаш да, Гӏалгӏайчен столицан санитарни хьал тоадеча оаха баь болх накъабаьнна хиларах. Ер бутт чакхбалале оаха кхы а бергба цу тайпара белхий», - аьлар «Сердало» газетага музея-заповедника кулгалхочо Сампенаькъан Ахьмадхана.
Цу тайпарча боламаша новкъостал ду республикан столицан куц хоза лоаттаде; цул совгӏа, боахамашта юкъера бувзам а лелабу.
