Гӏалгӏайчен къонача иллиалархочо Хьаьшанаькъан Иманас «Абилимпиксе» толам баьккхар
Владикавказе тӏаийцар «Абилимпикс» яхача яхьа Къаман чемпионатага доакъашхой харжара бӏал. Къилбаседа Хӏирий паччахьалкхен мах бара- экономически колледжа даькъ тӏа начӏал долча наьха майда йоаржайир. Къовсама керттера хозал яр Гӏалгӏайчера енача Хьаьшанаькъан Иманай концерта программа «Илли аллара говзал».
«Абилимпикс»- из говзала яхь хинна а ӏац, из кхы а дукхагӏа я. Цун къаьга хиларо, къахьегамо хьаелл йоккхий таронаш. Иманай программо хьагойтар, бокъонцахьа йолча говзала цхьаккха духьале йоацилга. Цо чемпионате дакъа лоацаш хилар - из хьалха боаккхаш бола лоархӏаме гӏа, дика масал да»,- аьлар «Сердало» газетага Республикан халкъа кхоллама Цӏен кулгалхочун гӏончас Котанаькъан Марема.
Хьаьшанаькъан Имана я Эбарга-Юртарча культуран Цӏен начӏал дола иллиалархо. Цунна йоккха сцена - из массазара хьамсара гӏулакх да. Имана республикан фестивалашка дакъа лоацаш хиннай, цун я тайп-тайпарча иллей яхьашка яьха цӏераш.
