Наркоманена духьалара шоай балхаш гойтар Наьсарерча къонача суртанчаша
Наьсарерча берий исбахьален ишколе дӏайихьар, наркомани яхача доккхача зулама духьалара кхетаче. Тахан даьржача цу бӏехача гӏулакха духьале еш дола берий сурташ оттадаьдар цига гойта.
«Наркоманена духьалара шоай къовсам сурташка гӏолла боаржабир бераша. Хӏара сага ший никъ ше хоржилга, дикадар дӏатетта водар хержар ший ираз доадаьрех волга белгалдир къонача суртанчаша. Шоай вахара наькъ тӏа сийрда, цӏена, беркатедар хьаллоацаш хила ӏомаду оаха тахан бераш, хӏаьта цар из деррига шоай кхолламга гӏолла малхадоаккх», - дийцар «Сердалога» ДХШ кулгалхо йолча Мержой Лидифас. Наьсарерча берий исбахьален ишкола доакъашхоша шоай мел болча низаца хьагойтар вайна; цӏенача хӏаман юхе бӏеха, зуламедар мел ийрча хет.
Наьха дегаш сомадаха, сийрда уйлаш йоаржае хьежар уж; шоай сурташка гӏолла. Гуш дар, хӏара болх кӏоаргга маӏан долаш, тӏатеӏӏа къахьегаш вӏашагӏбелла болга. Белгалде деза, иштта йолча кхетаченашка гӏолла дукха хӏама довза, ӏомаде йиш йолга. Бера хана денз ӏочудолла деза вай тӏехьен дегашка ший вахара никъ ийрчабаккха йиш йоацилга; цӏена, беркате хӏама доаржадеш вахар лоархӏаме долга.
