Укх тӏехьарча итт шера 52 моттиг тоаяьй Илдарха-Гӏалий тӏа
Дукха беркате хувцамаш хиннад Илдарха-Гӏалий тӏа, укх тӏехьарча шерашка. Россе Президента чӏоагӏонца йоаржаяьча вахарерча гӏулакхех йолча къаман проекта юкъе чуйодача федеральни программага гӏолла, укх тӏехьарча итт шера шахьара моттигаш йовзаргйоацаш хувцаеннай. 43 юкъара моттиг тоаеш, иштта 9 ковна доазонаш меттадоаладеш, къахьийгад цига. «Сердалога» из хоам шахьара мэрера бера.
Шахьара Ди дездеш дола цӏай хьаоттале, деррига балхаш юххьанца къоастаяьча ханал хьалха чакхдаьха балар гӏадвугаш да. Бахархошта доккха совгӏат хилар Первомайски, Дьякова, Гӏулой, Оскананаькъан оалача урамий - юкъарча йиъ моттига куц эргадаккхарах.
Никъ тоабеш, паргӏата дола гӏашлой наькъаш дехкаш баьхкар цига болхлой, иштта сийрда лампаш егӏа; гӏандаш, нувхашта лаьрхӏа яьшкаш оттаеш къахьийгар. Таханарча хано дӏадеххача тайпара, шахьара моттигий хӏама тоадаро бахархой хьал дикка аттача доаккх.
