Хьалхарча даькъе ловзача дикагӏа волча футболиста цӏи шийх яккхийта хьожаргва Баканаькъан Заьлмаха
Россе премьер-лиган 2025/2026 шера дикагӏа волча хьалхарча сиза футболиста цӏи къайсачарашта юкъе ва футболист Баканаькъан Заьлмаха. Из хоам «Сердалога» бир футболах йолча Федераце зарбан болх лелабераша.
«Российски премьер-лиго баьча хоржама юкъе латт вай мехкахочун цӏи. Эггара толашагӏа вола хьалхарча даькъа футболист белгалвеш дола гӏулакх да из. «Локомотив» яхача тоабанца ловзаш дикка говзал гойтарех ва вай мехкахо. Ма дарра аьлча, футбольни доазон тӏа ший мишта хьовза веза, малагӏа хӏамаш теркалде, лораде деза ховш вола футболист ва из аьлча, товргда Зелимханага.
Дукха ха йоацаш хиннача ловзаре 3 бургац чутохаш белгалваьлар из»,- йоах тхога бенача хоамо.
«Локомотива» дикагӏа вола ловзархо хинна , ший моттиг дикка чӏоагӏъяь дӏаотта аьттув баьннаб вай мехкахочун. Хӏанз хила дезача ловзаре котвалар чӏоагӏа лоархӏаме да цунна, бакъда дакъа лоацарашта юкъе дукха ба лакха говзал йола, дикка цӏихеза футболисташ. Цунга хьежжа, ший мел бола низ ураоттабаь ловза везаш ва вай мехкахо», - дийцар тха газетага мехкарча футбола Федераце президента Хьулахой Хаважа.
