Гӏалгӏайчен вахархочо бада тӏара кораяь топ, ше раьза волаш, дӏаелар полицега
Хьем боаццаш-хьехама болх дӏахьош, моттигерча полице, иштта Гӏалгӏайче гӏолла йолча Россе МВД Жӏайрахьарча зуламхой лохача болхлоша моттигерча вахархочунгара цкъа ювла топ дIаийцар. Цу сага, хьадехаш хӏама а доацаш, ше раьза волаш, из дӏаелар ӏаьдалга.
«Цо яхачох, из топ цун даь хиннай. Да дӏаваьннав 2008 шера. Шоай цӏен бада тӏа лостам беш, цӏаьхха, кораяь хиннай из. Хӏанз укх сахьате из топ дӏаяхьийтай тохкам бара Гӏалгӏай Республике гӏолла йолча МВД экспертно-криминалистически центре. Полице болхлой цу тӏехьа дӏахо тӏахьожама болх дӏахьош ба», - аьлар «Сердало» газетага Гӏалгӏай Республике гӏолла йолча Россе МВД.
Бокъонаш лораераша хьалхадоаккх, бахархой таро я бокъонах доацаш леладеш дола герз, кхыбола герзацара гӏирс ӏаьдала хьачубала; цох боагӏа мах дӏабехаш а иштта мах боацаш а.
Из болх дӏахьош ба дийнахьа-бус ца хадаш, чурча гӏулакхий ха деча даькъ тӏа. Цун фу мах ба ха таро я, шоаш бахача моттигерча полицега гӏолла.
