Гӏалгӏайчен вахархочох дегабуам бу, гӏулакхерча сага кхаъ беннаб аьнна хеташ
Гӏалгӏай Республике гӏолла йолча Россе СК СУ Наьсарен кхален юкъерча тохкама даькъ тӏа уголовни гӏулакх хьадийллар, 54 шу даьннача республике вахача сага духьала, бокъонах ца доагӏаш паспорт доаккхаш цо 150 эзар сом даларах дола уголовни гӏулакх. Хьалхагӏа из саг терроризма новкъостал деш гучаваьнна хилар, хӏаьта хӏанз а юкъе латтача сагага гӏолла полице болхлочунна из ахча делар цо. Цу гӏулакха юкъе лаьттача сага духьала а уголовни гӏулакх хьадийллар. Тохкама болх дӏахьош ба, УФСБ юкъе а йолаш.
«Тохкамхоша яхачох, 2026 шера саькура бетта, РФ доазон тӏа тӏаэцаш йоацача терроризма тоаба юкъе а ваьнна, республикан вахархочунга гӏолла 150 эзар сом цо кхаъ белар доадаь паспорт даккхарах республике вахача сага цӏерагӏа. Паспорта да, е дехар чулуш е паспорт хьаэцаш, ше тӏахиннавац. Хьалхагӏа а цунна духьала, Гӏалгӏай мехка гӏолла йолча Россе СК тохкама болхлоша уголовни гӏулакх хьадийлладар 5 д. 33 ст., 1 д. 205.4 ст. (террористашта новкъостал дар). Из хьалаьцар, судо цунна боагӏаш бола бехк бергба», - аьлар «Сердало» газетага Гӏалгӏайчен Тохкама комитете.
Карарча хана цу уголовни гӏулакхах тохкама болх дӏахьош ба, нийсденна гӏулакх къоастадеш. Из деррига уголовно-процессуальни законах деш да.
