Даьла духьа цӏий дӏачутелача наха дер, мах баь варгвоацаш гӏулакх да
Республикерча цӏий дӏачутелача моттиге, из беркате гӏулакх хьаллаца хьабехаш ба бахархой. Тахан, наджгоанцхой бетта 30-ча дийнахьа, цига гуллургба Даьла духьа из маьл хургбола гӏулакх леладеш бола нах. «Сердалога» из хоам цу моттигера бера.
«Наха дарба деш хӏара денна эшаш да цӏий! Цхьацца хатарашка лозабаьрашта, доагам дарашта, эттӏабаьрашта, бер деш халчаэттача кхалнаха меттабахка эггара чӏоагӏагӏа эшар цӏий хул. Цул совгӏа, массахана цӏий детта дезаш лазараш долаш нах ба вайна юкъе, цудухьа Даьла духьа аьнна нигат даь из дика хьаллоацараша дӏахьор боккха болх ба», - дийцар тхога унахцӏенон гӏулакхех йолча министерстве.
Могаш боацарашта гӏо де ловш хилар, ший низ дӏакхоачаш дола гӏулакх цар хьал аттачахьа даккха хьажар Дала маьл язбергбола хӏама да! Уйла е эттача вӏалла а хам баь ца валлал дола дика да-кх из. Цӏий дӏачудала водача хана, малагӏа кийчо е еза, малагӏа кхача баа йиш яц ха йиш я цу оагӏонцарча моттигага гӏолла. Вай массане дӏа-хьа доаржаде деза дика хӏама да из тахан!
