Магӏалбика бахархоша дакъа лоацаргда, Ерригроссийски къахьегама шоатта дӏахьош
Бекарга бетта 25-ча дийнахьа, Магӏалбика бахархой таро хургья, шоай шахьар тоаяра шоашкара дакъа юкъедахьа. «Вахара хьалаш» яхача къаман проекта чудоагӏаш, цу дийнахьа дӏахьоргда Ерригроссийски къахьегама шоатта ди. Бахархоша тоадергда «Дика шахьара хьалаш хьакхоллар» яхача программах хьадаь хинна доазонаш. Къахьегама шоатта ди дӏахьош да, Ерригроссийски кхадж тассара ди долаш, из дика таро я цхьана шахьар дегӏайоалаяра хьал дувца.
«Оаха тӏахьех беррига бахархой, цу лоархӏамеча кхетачене дакъа лацара. Шоатта ди дӏахьош юкъарлон моттигашка, коашка лостам бе лерхӏ, иштта дӏайогӏаргья гаьнаш, зизаш. Вайх хӏаране таро я ший урам, ший цӏа тоаде, хозде, цига лостам лоаттабе», - аьлар «Сердало» газетага Магӏалбика кхален администраце кулгалхочун гӏончас Кӏориганаькъан М.
Белгалду, «Вахара хьалаш» яхача къаман проекта чудоагӏаш да еррига шахьар дегӏайоалаяра хаттараш, цига хӏара сага хоалуш хургда ший хьамсара шахьар, юрт хоза тоаенна хилар.
